قصة صعود بى ام دبليو
قصة صعود BMW
لا تنسى الإشتراك فى قناتنا للفيديوهات القصيرة : ميون تون ❤❤
قصة صعود العلامة البافارية لصناعة السيارات المعروفة اختصارا ب BMW مين هو المؤسس للشركة ؟ مين اللى قدر يوصلها للشكل اللى نعرف بيه BMW النهاردة ؟ وايه قصته وقصة BMW معاه ؟ وازاى انتهت قصة الصعود بمأساة ؟
فرانس جوزيف بوب تقدر تقول عليه هو المؤسس الحقيقى ل BMW رغم أن BMW اتأسست قبل ما يرتبط اسمها بيه ، بس الحقيقة أنه هو الراجل العبقرى اللى خلى BMW بالشكل اللى نعرفها بيها النهارده.
إقرأ أيضاً : كذبة الجمعة البيضاء , قال تخفيضات قال !!
بوب اتولد فى فينا سنة ١٨٨٦ وفى سنة ١٩٠١ عائلته انتقلت للعيش فى بلد اسمها Brno فى التشيك وفيها بدء دراسة هندسة الميكانيكا والكهرباء فى الكلية التقنية و تخرج منها ١٩٠٩ ورجع على فينا.
فى فينا استلم أول وظيفة ليه كمهندس فى شركة AEG الشركة العملاقة للصناعات الكهربية وبسرعة وبسبب نبوغه أصبح رئيس قطاع القطارات الكهربائية وأحد أهم المسئولين عن تطوير قطارات السكك الحديد الكهربية فى مقاطعة mittenvald الألمانية.
إقرأ أيضاً: ازاى تحقق ثروة من اليوتيوب . 4 اسئلة مهمة واجابتها
ومع بداية الحرب العالمية الأولى ، انضم بوب كمهندس لشركة تابعة لجيش الامبراطورية الهنغارية النمساوية المعروفة اختصارا k.u.k وهى شركة متخصصة فى الصناعات الممولة لسلاح الطيران .
ومع نهاية ١٩١٤ الشركة تكلفه بالرجوع لفينا للبحث عن تصميم لمحرك جديد للقوات الجوية بالتعاون مع اكبر مصنعى محركات الطائرات وقتها والبداية كانت مع AEG وبعدها Austro Daimler و NAG .
فى الوقت ده Austro Daimler كانت تصنع محرك ١٢ اسطوانة خاص بالقوات البحرية ، والمحرك ده كان عليه طلب كبير جدا ونال إعجاب بوب .
وبسبب الطلب الكبير على المحرك ده ولأن بوب لا يمتلك رفاهية الوقت لانتظار ديملر من الانتهاء من كامل الطلبية الضخمة اللى ملتزمة بيها مع القوات البحرية واللى وقتها معناها أنه ينتظر فى قائمة الإنتظار لسنين ، بوب كان مجبر أنه يفكر فى حل تانى و سريع عشان يلاقى شركة تانية عندها القدرة على تصنيع محرك وكمان بدون انتظار ، هنا بوب وجد شركة RMW فى مدينة ميونخ والشركة دى فعلا كان عندها الإمكانيات والمقدرة على تصنيع محرك ينفع يخدم فى القوات الجوية ، لأن الشركة من وقت قصير جدا قدمت محرك بس فشل بصورة كبيرة جدا.
إقرأ أيضاً: هل ينهار الاقتصاد الالمانى ومدى تداعيات على الاقتصاد العربى
ولأن تصميم المحركات واختبارها بياخد وقت طويل جدا ، بوب طرح فكره عبقرية أنه يستعين بتصميم محرك شركة ديملر و يبدء فى إنتاج نفس المحرك فى مصنع RMW ، وبالفعل قدر يقنع ديملر بالفكرة وفعلا بدء التجهيزات لإنتاج المحرك .
فى ١٩١٦ كان من المتوقع البدء فى إنتاج المحرك ، الا أنه لما راح لشركة RMW لقى كوارث فى إنتاج المحرك سواء من المديرين الفنيين أو التجاريين وبالشكل ده المحرك مش هيكون بالصورة اللى ترضيه ولا يهتم تسليمه فى وقته ، وبالتعاون مع RMW بادر بوب بأنه يقعد فى الشركة ويراقب بنفسه إنتاج المحرك ، ومن وقتها بوب اصبح المسؤل الاول عن انتاج المحرك بالشكل المناسب ، فى الحقيقة بوب كان شخصية إدارية وهندسية لامعة ، ووقتها اتضح لكل الناس أنه بوب هو الأصلح لقيادة شركة RMW وفعلا أصبح هو المدير العام للشركة اللى غيرت اسمها ل BMW وفعلا المحرك اللى اتسمى وقتها bmw IIIa اثبت كفاءة وقوة تؤهله فعلا للقوات الجوية .
إقرأ أيضاً: الاسعار فى 2022
ومع انتهاء الحرب العالمية الأولى سنة ١٩١٨ ، كان لازم الشركة تغير نشاطها العسكرى لنشاط مدنى و فى ١٩١٩ عمل اتفاق مع شركة knorr-bremse عشان يصنع ليهم فرامل لقطارات السكك الحديدية ، بس كمصنع فرامل ، مش ده اللى بوب كان عايزه.
سنة ١٩٢٢ بوب بدء فى مشروع جديد لما عمل شراكة مع شركة Otto flugmaschin fabrik لصناعة المحركات واخيرا تحرر من knorr , ورجعت bmw لمجالها فى صناعة للمحركات.
سنة ١٩٢٢ تحت قيادة بوب ، بدأت BMW تبقى الشركة اللى كلنا نعرفها بيها النهاردة
فى السنة دى BMW دخلت صناعة الدرجات البخارية وهنا تقدر تقول أنه صناعة وسائل المواصلات بقت لعبتها مع احتفاظها بقدراتها على تصنيع محركات الطائرات ، فى ١٩٢٣ ظهرت أول دراجة بخارية عليها علامه BMW واللى كان اسمها R32 واللى تم تزويدها بمحرك ثنائى الأشواط هى دى الدراجه البخارية الام لكل الدرجات البخارية اللى نعرفها النهاردة.
بعدها ظهرت عربيات 319 الصغيرة والكبيرة بس على نفس الشاسية القديم ,عشان كده وفى سنة ١٩٣٦ bmw تبدء فى إنتاج شاسية جديدة لجيل جديد من السيارات السيدان واللى بدايتها كانت BMW 326 وبعدها اختها الأصغر BMW 320 ومنها ظهرت 321 BMW واللى تم استبدالها بالعربية الكوبية BMW 327 , وفى نفس السنة ومع مشروع جديد BMW بدأت إنتاج عربية bmw 328 وعلى عكس كل العربيات قبلها العربية دى كان ليها محرك و شاسية مخصوص اتميزت بقوتها واللى تخطت ٧٩ حصان ، المحرك ده يعتبر واحد من أنجح محركات BMW ، لان ده المحرك اللى خلى اسم BMW يظهر وبقوه فى عالم السيارات لما فاز بيه السائق المحترف ernst henne فى سباق فئة ٢ لتر واللى حقق بيه النصر فى سباق frilz huscke hanstein ، وفى ١٩٣٧اكتر من ١٠٠ عربية BMW فازوا لسباقات حول العالم كله.
وفى مجال الطائرات وفى سنة ١٩٢٨ BMW ارتبطت بعقد مع الشركة الأمريكيةpratt & Whitney لتصنيع محركين بالتبريد الهوائي للطائرات ، وهو ده اللى ضمن ليها أنها تفضل فى منطقة المعرفة الكيفية لصناعة محركات الطائرات ، وعلى الرغم من أنه الثلاثينات كانت مهمة جدا لصناعة السيارة الجميلة ٣٢٨ اللى تعتبر السيارة الرياضية الاولى واللى توالت وراها موديلات تعكس عبقرية شركة BMW ومن وراها العبقرى بوب الا أنه برده عقد الثلاثينات كان مهم جدا ل BMW كمصنع لمحركات الطائرات وترسيخ الصورة ده فى أذهان كل الناس.
وفى ١٩٣٥ من تانى bmw تستحوذ على شركة بس المره دى شركة Brandenburg motors works المتخصصة فى صناعة المحركات سواء عربيات أو طائرات او حتى دراجات بخارية .
ومع صعود هتلر لسدة الحكم فى ألمانيا وبروز اسم BMW كعلامة لشركة قادرة على صناعة محركات الطائرات وخصوصا المبردة بالهواء ، خلت هتلر يشوفها على أنها شركة استراتيجية مهمة جدا فى خطته لصناعة الطائرات للجيش الألمانى ، ومع بدايات الحرب العالمية الثانية كانت أهم استعدادات هتلر هو الشركات اللى بتمثل قوة صناعية جبارة تقدر تدعم صفوف جيشه باحدث المعدات والأسلحة فى كل المجالات ، وهنا bmw كانت لازم تبقى موجودة.
فى نفس الوقت بوب كان متشكك جدا من النوع ده من التوسع للأغراض العسكرية الخاصة بتسليح الجيش النازى ، لانه شاف أنه وعلى الرغم من العوائد المالية المرتفعة المضمونة الا أنه ربط مصير الشركة بالقرارات الصادرة من من مكتب الرايخ الثالث .
وتحت ضغط مسؤلى وزارة الطيران وفى يناير ١٩٤٢ اجتمع مجلس إدارة BMW عشان يقرر إعطاء بوب إجازة مفتوحة عن العمل وبعدها تم تعينه فى مجلس الإشراف وفى المكان ده نقدر نقول أنه بوب انتهت ولايته على BMW بشكل كبير .
مع نهاية الحرب ومع زيادة تعثر BMW وفى محاولة لإنقاذها تم تعين بوب من تانى مدير عام وهو عنده وقتها ٥٩ ، بس للاسف الحرب كانت انتهت بهزيمة المانيا ، الحلفاء اعتقلوا بوب وتم تصنيفه على أنه عضو اسمى فى الحزب نازى ، لكن بمجرد استئنافه اتضح ليهم أنه كان برئ وتم الإفراج عنه ، و بعدها بوب حاول يرجع من تانى لقيادة BMW ، لكن كل محاولاته فشلت ومع تفكيك مصانع BMW كجزء من اتفاقيات استسلام المانيا ، بوب اتنقل للعيش فى مدينة شتوتغارت واللى كانت النهاية لتاريخ بوب وتاريخ BMW فى وقت كان من الواضح أنه BMW انتهت للابد وفى ٢٩ يوليو ١٩٥٤ مات العبقرى فرانس جوزيف بوب اللى لولاه من الوارد جدا علامة BMW مكنتش عاشت لحد النهارده.
تعليقات
إرسال تعليق