مؤشر أحمر الشفاه حقيقة اقتصادية
لما اى دولة فى العالم يحصل فيها ازمة أو كارثة طبيعية كبيرة أو لما تكون مهددة خارجياً ، ساعتها اى مستثمر بيقولك وعلى ايه البهدله ، ويقوم ساحب فلوسه أو على الأقل يقلل استثماره أو يلغيه ، وبالتالى يحصل انكماش فى الاقتصاد مدفوع بمخاوف الناس ، امريكا مش كبيرة على كده ، لانه دا اللى حصل بعد ١١ سبتمبر ، الناس صحت على بلد برجين التجارة فيها بيضربوا بطيارات مدنية ، كل ده كانت نتيجته انكماش فى أداء الاقتصاد الأمريكى تبعه انكماش فى الاقتصاد العالمى.
اقرأ أيضاً : كذبة الجمعة البيضاء , قال تخفيضات قال !!
فى وسط ما الناس بدأت تعانى اقتصاديا مبيعات مستحضرات التجميل وبالخصوص احمر الشفاه ارتفعت ارتفاع ملحوظ ، الرئيس التنفيذي Leonard lauder لواحده من أكبر شركات صناعة مستحضرات التجميل Estee lauder قال وقتها أنه مبيعات احمر الشفاه زادت ١١٪ .
من هنا تم ابتكار واحد من اغرب مؤشرات الاقتصاد - بالضبط كده زى ما توقعت - مؤشر احمر الشفاه lipstick index اللى هيكون واحد من المؤشرات الدلالية على وجود ركود اقتصادى ، الظاهرة دى جذبت انتباه اقتصاديين كتير بغرض دراسة و تحليل مبيعات احمر الشفاه و مستحضرات التجميل وقت الازمات اللى حصلت قبل كده ، فى محاولة منهم انهم يكتشفوا ايه سر العلاقة العكسية الغريبة و المريبة بين تراجع الأداء الاقتصادي وارتفاع مبيعات احمر الشفاه ، والسؤال ليه فى ظل أزمة مالية الستات بيصرفوا فلوس وبزيادة على احمر الشفاه -اللى هو ايه الهيافه دى - .
بس الاول كده خلينا نعرف ايه هو الركود الاقتصادى ، الركود الاقتصادى هو انخفاض شديد فى النشاط الاقتصادى والانخفاض ده بيأثر على الشركات وكمان الأفراد ، الشركات بتقلل الاستثمار وتسرح عمالة وبالتالى انخفاض فى الناتج المحلى للدولة مع ارتفاع فى مستويات الأسعار كل ده بيخلى الناس تمسك أيدها فى صرف الفلوس اوى - ماهو محدش عارف الدنيا رايحه فين - وده اللى بيسميه الاقتصاديين تراجع النشاط الاستهلاكى بسبب انتشار الخوف وعدم اليقين .
اقرأ أيضاً : طرق بسيطة لادخار الأموال دون الشعور بالحرمان
جامعات تكساس المسيحية و تكساس فى سان انطونيو و مينسوتا و أريزونا عملوا دراسة سنة ٢٠١٢ تحت اسم boosting beauty in an economic decline mating spending and the lipstick effect , اللى هو ازدهار التجميل فى أوقات التراجع الاقتصادى ، فى محاولة لتتبع مؤشر احمر الشفاه لاقوا أنه فعلا سنة ٢٠٠٨ وبعد الكساد العظيم ١٩٣٠ شركات مستحضرات التجميل عملت ارباح عالية اوى ، مثلا شركة L'Oreal الفرنسية حققت مبيعات سنة ٢٠٠٨ بزياده نسبتها ٥٪ على الرغم من إفلاس شركات كتير وبنوك .
ومجلة economist فى مقالها المنشور تحت اسم cosmetics in the downtown lips reading قالت إنه مبيعات مستحضرات التجميل فى أمريكا زادت بنسبة ٢٥٪ بعد هجمات سبتمبر ، مش أنا قولتك نسوان فاضية ونفس الكلام ده حصل خلال أزمات ١٩٩٠ وكمان الكساد العظيم ١٩٣٠ .
العمالة واحدة من أهم معايير نمو الشركات ، سواء توظيف أو تسريح عمال ، فلما الشركة تبقى فى حالة ازدهار تلاقيها عمالة توظف موظفين جداد ، ولما تبقى الدنيا خربانة تلاقيها تسرح عمالها ، اهو ده بقى اللى المفروض يحصل فى أوقات الأزمات ، بس الا إذا كنت شركة مستحضرات تجميل ، لانه وطبقا لتقرير من إدارة شركة الاستثمار البريطانية RAP CAPITAL فشركات تصنيع مستحضرات التجميل بتعمل احلى فلوس وتوظف موظفين جداد فى أوقات الأزمات عشان تلاحق على الطلب المتزايد على منتجاتها وخصوصا احمر الشفاه - وطبعا لو راجل قول للمدام لا - .
السؤال بقى هنا ، ليه الستات بيعملوا كده ، الاجابة أنه اثناء الأزمات الاقتصادية وتقشف وتقليل النشاط الاقتصادى الستات بدورهم بيتوقفوا عن شراء الكماليات الغالية الغير أساسية أو اللى يمكن الاستغناء عنها ولو مؤقتاً زى الجزم أو الشنط أو المجوهرات ، ولأن الستات بطبعهم بيحبوا صرف الفلوس فيبدؤا شراء الكماليات الصغيرة اللى سعرها معقول واللى هى فى الغالب مستحضرات تجميل عامة واحمر الشفاه خاصة ، وده بيديهم شعور بالرفاهية فى ظل عدم قدرتهم على شراء المنتجات الغالية .
سنة ٢٠١٦ جامعة هارفارد الأمريكية عملت دراسة لقياس تأثير احمر الشفاه على الطلبة الأكاديمين وعلاقته بدرجاتهم فى الامتحانات ، شملت الدراسة ١٨٦ تم تقسيمهم على ٣ مجموعات ، المجموعة الأولى مجموعة معتادة على وضع المكياج واحمر الشفاه ، المجموعة الثانية بتسمع موسيقى تحفيزية ، المجموعة الثالثة بتحب الرسم ، تلاحظ من الدراسة ارتفاع درجات طلاب المجموعة الأولى مقارنة بالمجموعتين التانية و الثالثه ، وده خلى الدراسة تقول أن احمر الشفاه عزز لدى طلاب المجموعة الأولى احترام الذات والثقة بالنفس .
الدكتورة ايبرل لام بينسن عالمة النفس المشهورة والمتخصصة في اضطراب الشراء القهرى بتقول أنه فى أوقات الأزمات النساء اللى تضع احمر الشفاه بيعملوا كده للظهور بمظهر أكثر حيوية وأكثر إطلالة وأنوثة .
اقرأ أيضاُ :كيف تضيع اموالك بسذاجة على اشياء غير مهمة ؟ازاى تصيع على اللى بيصيعوا عليك ؟
وعشان كده شركات مستحضرات التجميل هى شركات عملاقة نادرا ما تتباطؤا أو تنكمش على نفسها بل على العكس فهى دائما فى طليعة الشركات النامية ، مثلا ايرادات شركات مستحضرات التجميل وصلت ل ٥١٠ مليار دولار فى عام ٢٠٢١ ، ومن المتوقع وصولها لاكتر من ٧١٥ مليار دولار بحلول عام ٢٠٢٥.
مؤشر احمر الشفاه مهم جدا لبحث ظاهرة بيسميها الاقتصاديين تأثير الدخل income effect واللى تعتبر جزء من نظرية اختيار المستهلك consuming choice theory اللى بتوضح مثلا اختيارات الناس ليه بتتغير فى أوقات الأزمات ، مثلا الناس تفضل التخلى عن شراء السلع الكمالية الغالية لعدم قدرتهم على شراء الأغلى سعرا ، كل ده بيفسر ازدهار نشاط السينما الرخيصة والمطاعم الرخيصة فى أوقات الركود الاقتصادى ، والسبب لجوء الناس لوسائل ترفيهية رخيصة بديلة عن الغالية . |
السؤال بقى دلوقتى إذا كان مؤشر احمر الشفاه اثبت فعاليته فى أزمات ٢٠٠٨ و١٩٣٠ و ١٩٩٠ ، فما هو وضعه خلال ازمه وباء كورونا؟
على عكس المتوقع لمؤشر احمر الشفاه فهو أيضا عانى من انخفاض بشكل ملحوظ أثناء الأزمة فتبعا لتقرير من McKinsey& Company فى مايو ٢٠١٠ فمبيعات احمر الشفاه تراجعت بنسبة ٣٠٪ فى سنة ٢٠٢٠ وخصوصا احمر الشفاه ؟ تفتكروا ليه ؟
اقرأ أيضاً :هل تنهار ألمانيا ؟ و مدى تداعياته على المصريين ؟
بسبب وجود mask , وأقنعة الحمايه من الوباء , فبالتالى الحاجة لوضع المكياج او احمر الشفاه تحت mask انعدمت , ولكن مع بداية تلقى اللقاحات وبدء الاقتصاديات فى الفتح وعودة الحياة تدريجياً تلاحظ ارتفاع شديد فى مبيعات احمر الشفاه لاكتر من ٨٠ ٪ ، فوفقاً للبيانات الصادرة من شركة أبحاث السوق IIR واللى فيها تتبعت مبيعات احمر الشفاه ، فالمبيعات ارتفعت فى أبريل ٢٠٢١ باكتر من ٨٠ ٪ مقارنة بنفس الشهر لعام ٢٠٢٠ .
| عملاق البيع بالتجزئة Walmart قالت لشبكة CNN انه فى مايو ٢٠٢١ قطاع احمر الشفاه كان هو الافضل أداء من بين جميع قطاعات مستحضرات التجميل . |
تعليقات
إرسال تعليق