كذبة الجمعة البيضاء .. قال تخفيضات قال !!
كذبة الجمعة البيضاء .. قال تخفيضات قال !!
لا تنسى الإشتراك فى ميون تون : قناة يوتيوب معلومات شيقة فيديوهات قصيرة
الجمعة البيضاء ، فى ناس بتستنى الجمعة دى من السنه للسنة ، قال ايه ،التجار بيبعوا بالخسارة قال 😂😂، أنا زيك كده كنت معتقد أنه الحداية بترمى كتاكيت ، بس اللى لازم تعرفه أنه مرات الأب عمرها ما هتكون ابدا الست الوالده.
فى يناير ٢٠١٢ الرئيس التنفيذى السابقٌ Ron Johnson ( خد بالك من السابق دى ) لسلسلة المتاجر الأمريكية JC Penney عمل اجتماع صغير كده مع كبار المستثمرين فى السلسلة وقدم اقتراح أنه شايف قصة الخصومات دى ضحك على الدقون ( دقنى ودقن معاليك ) وأنه لازم نصارح الزبائن ، وقال أنه طالما الخصومات اللى بنديها للناس فى المتوسط بتبقى ٦٠ ٪ بس الحقيقة أننا رافعين السعر الاولى للبضائع كتيير جدا ، يعنى من الاخر الخصومات دى بلح ( هو مقالش بلح بلح يعنى بس هى كده بالضبط ... بلح ) وقال كمان أنه ناوى يغير استراتيجية السلسلة فى تسعير المنتجات أنه مش هيقدموا خصومات وهمية للناس بس هما هيبيعوا البضائع بسعر قليل وأنه اكيد يعنى الناس هتقدر أنه مبنكدبش عليهم. واللى كان متوقعه أنه ده هيزود المصداقيه بتاعة السلسلة عند الناس وبالتالى المبيعات هتزيد .
اقرأ أيضاً ازاى تعمل فلوس من اليوتيوب
يعنى مثلا جزمة احنا عايزين نبيعها ب ٤٠ دولار بلاش نعمل سعرها ٦٠ دولار ونعمل عليها خصم ونقول سعرها بعد الخصم ٤٠ دولار ، لاء احنا نقول سعرها عالطول ٤٠ دولار من غير خصومات ولا تخفيضات. الاستراتيجيه الجديدة الصحف اتكلمت عنها وشرحتها للناس ووضحتها بكل تفاصيلها ، الغريبة أنه رد فعل الناس كان على عكس توقعاته تماماً . لانه وفى نهاية ٢٠١٢ مبيعات JC Penney انخفضت ٤,٣ مليار دولار والسلسلة خسرت مليار دولار كمان ، مش بس كده وكمان خسرت اكتر من نصف قيمتها المالية. وزي ماهو متوقع طبعا ، فى أبريل ٢٠١٣ Ron Johnson لبس البجامة وخد لقب سابق قد الدنيا.
السؤال بقى ليه الزبائن أو المستهلكين اتصرفوا بالمنطق ده ؟ رغم علمهم بالسياسة الجديدة ؟ وعلمهم أنها معتمدة على المصداقية والوضوح؟
الاجابة هى اللى قالها علماء النفس - دائما خلى بالك أنه العلماء المهتمين بشرح تصرفات البشر وسلوكياتهم هما علماء علم النفس عشان كده علم الاقتصاد شبه قائم على علم النفس - إنه الناس لما بتشوف كلمة تخفيضات أو خصومات يترجمها على أنه بيع بسعر قليل أو رخيص لأنهم بيقارنوا السعر قبل الخصم بالسعر بعد الخصم وبدون البحث عن السعر الاولى الحقيقى ، ويا سلام بقى لو التاجر كان صايع وكتب الكلمة السحرية ( لفترة محدودة ) - أهى الكلمة دى بالذات كانت سبب طلاق ناس - المهم الكلمة دى بتخلى الناس توقع تحت ظاهرة معروفة باسم الخوف من تفويت الفرص ( fear of missing out ) .
الدكتور Dan Herman كان اول واحد يتكلم عن الظاهرة دى سنة ١٩٩٦ ، بيقول أن الناس ببساطة بتخاف من تفويت الفرص أو الصفقات المغرية ( طبعا فى اعتقادهم ) وبتفرح فى حالة الحصول عليها حتى لو فى حقيقة الأمر هما مش محتاجينها ، عشان كده فى حالة تجمهر الناس قدام محل هتبقى تموت وتعرف المحل ده بيبع ايه زى فراخ الجمعية كده ايام زمان بس الفرق أنه احنا كنا محتاجين الفراخ فعلا ، كل ده بيفسر ليه الجمعة البيضاء فعلا بيضاء على التاجر وسودة على الغلبان الزبون .
السؤال بقى هو فعلا المنتجات المعروضة فى الجمعة البيضاء بتبقى رخيصة فعلا ؟
فى نوفمبر ٢٠١٢ the wall street journal عمل تجربة لطيفة جدا ، أنه تتبع اسعار ١٧٤٣ منتج معروض على الإنترنت ، المجلة لاحظت أنه خمس المنتجات اسعارها زادت بنسبة ٨٪ فى الأسابيع اللى قبل الجمعة البيضاء ، مش بس كده ، دى فيه منتجات كمان زى الالعاب والأدوات زاد سعرها بنسب اكبر وصلت لاكتر من ٢٣٪ قبل يوم الجمعة.
ببساطة كده ، التجار بيرفعوا الاسعار قبل الجمعة البيضاء ويرجعوا يخفضوها فى الجمعة البيضاء لاسعارها اللى تضمن ليهم مكاسب وأرباح محترمة كمان ، هو ده اللى أكدته المؤسسة البريطانية الخاصة بأبحاث المستهلك المعروفة باسم Which? لما عملت دراسة تراقب فيها اسعار ٨٣ منتج معروض بخصومات كبيرة فى الجمعة البيضاء عشان تقدر تقارنها باسعارها خلال شهور بعد الجمعة البيضاء ، النتائج كانت متوقعة ( اصل التاجر مش جى يخسر ولا جى يهزر ) ، اكتشفوا أنه ٩٥٪ من المنتجات اللى انباعت بخصومات فى اليوم ده كانت متاحة بنفس السعر او حتى أقل خلال ٦ شهور اللى بعد الجمعة البيضاء ، و ٤ منتجات بس هما اللى اتعرضوا بسعر مخفض فى الجمعة البيضاء عن بقية أيام السنة ، يعنى الناس اكلت باللوظة وانبسطت كمان.
اقرأ أيضاً : الاسعار هتوصل لفين فى ٢٠٢٢
سنة ٢٠٢٠ موقع runrepeat عمل مقارنة بين اسعار الأجهزة الإلكترونية قبل و أثناء يوم الجمعة البيضاء فمثلا تليفزيون توشيبا ٣٢بوصة كان السعر قبل يوم الجمعة ١٠٠ دولار ويوم الجمعة سعره كان ١٣٠ دولار يعنى ٣٠ دولار زيادة ، ولاب توب Acer aspire 5 كان سعره قبل يوم الجمعة ٢٩٧ دولار وصل سعره فى يوم الجمعة البيضاء ٣٤٨ دولار يعنى ٥٠ دولار زيادة.
الصحفية الأمريكية المتخصصة فى شئون البيع بالتجزئة Suzanna kapner بتقول أنه التجار بيبقوا عاملين حساب الخصم وهما بيسعروا المنتج لأول مرة وبيبعوا المنتجات بهامش ربح ضخم طول السنة مقارنة بهامش ربح أقل فى يوم الجمعة البيضاء ، يعنى مثلا لو جاكت سعره طول السنة ٨٠٠ جنية ويوم الجمعة البيضاء وصل ٥٠٠ جنية ده مش معناه أنه التاجر خسران ، ابدا ، ده معناه أنه اتخلى عن هامش ربح ضخم وأنه سعره الحقيقى كان أقل من ٥٠٠ جنية.
اقولك اه ، خصم حقيقى جدا بس خلينى اقولك على حيلة بيمارسها التجار الكبار فى اليوم ده ، الحيلة العبقرية دى اسمها door buster & door crasher بالبلدى كده نجيب رجل الزبون ، رجل الزبون ده مكلف برضه بس هى لعبه محسوبة ومحسوبه حلو اوى ، أنه المتجر يجى يوم الجمعة البيضاء ويختار منتجات ليها شهرة كبيرة ويعمل عليها خصومات كبيرة جدا بتوصل احيانا لخسارته كمان ؟ طب وهو استفاد ايه ؟
زى ما قولتلك كده نجيب رجل الزبون ، الحيلة الاولى هى طمئنة الناس لاسعار المتجر والتأكيد على رخص بضاعته ، الحيلة التانية الكميات المعروضة من المنتج المشهور ده بتبقى قليلة جداً ، وبالتالى ناس قليلة برده هى المستفيدة من العرض ده فى حين أنه أغلبية الناس اللى راحوا المتجر مخصوص عشان المنتج ده لقوه خلص ، فبالمره بقى يدوروا على منتجات تانية طالما أنه المتجر ده أسعاره رخيصة .من الاخر كده الايفون ده كان طعم اصطاد الناس والمتجر باع منتجات كتير جدا بهامش ربح كبير وكسب فلوس كتير جدا ، حتى الخسارة فى الايفون دخلت تحت بند مصاريف الدعاية والتسويق .
فى يوم الجمعة البيضاء سنة ٢٠٠٨ وبالتحديد فى متجر Walmart فرع نيويورك اتجمع اكتر من ٢٠٠٠ شخص قبل ما يتم حتى فتح باب المتجر ، وحصل تدافع تتسبب فى كسر باب المتجر والناس تدافعت جوه المتجر ودهسوا موظف اسمه jdimytai damour عنده ٣٢ سنة واتوفى فى المستشفى بعدها ب ٤ ساعات .
السؤال بقى ليه اللى حصل ده حصل ؟
السبب كان عروض door buster ، المنتجات المعروضة بكمية قليلة جدا وسعر قليل مغرى ، بتخلى الناس تفقد صوابها ومتشوفش غير المنتج ده.
فمثلا شركات زى سامسونج وسونى وباناسونيك بيعملوا شاشات أقل جوده مطابقة لشاشتها بس مخصصة لموسم التخفيضات وفى ٢٠١٧ سامسونج استغلت شاشة مشهورة عندها معروفة بالجوده العاليه ومتعددة المهام اسمها mu6300 وصنعت شاشة اسمها mu6290 اللى اتعرضت للبيع على موقع best buy الأمريكى فى يوم الجمعة البيضاء ، اللى الناس متعرفوش ساعتها أنه الشاشة دى كانت رخيصة مش لوجود خصم عليها انما لأنها مصنوعة من خامات رديئة ومواصفاتها قليلة وملهاش علاقه بالشاشة mu6300 الا فى التصميم الخارجى ، وبكده سامسونج استغلت جهل الناس فى التميز بين المنتج الاصلى والطراز المشتق منه.
للسبب ده معظم خبراء المبيعات بينصحوا الناس أنها تبعد عن التليفزيونات بالخصوص فى يوم الجمعة البيضاء ؟
الكاتب م : محمد توفيق
- أوكرانيا ... ساحة حرب روسية امريكية
- الأسعار فى 2022
- سلاح الصين المرعب
- هل تنجذب النساء للرجال ؟ لماذا ؟
- العملات الرقمية ... فوضى فى الصين
- تفكك أوروبا ... بداية النهاية
- العملات المزورة ... تاريخ من الإحتراف
تعليقات
إرسال تعليق