العملات المزورة ... تاريخ من الإحتراف
العملات المزورة ... تاريخ من الإحتراف
إزاي تعرف العملة اللي في إيدك مزورة ولا لاء ؟ طب لو معاك 100 دولار ممكن تعرف إذا كانت مزورة ولا لاء ؟ الإجابة مش سهلة على فكرة ، ليه ؟ لأن كل إسبوع مليارات من العملات المزورة بيتم مصادرتها أثناء القبض على مزورين أو موزعين في دول كثيرة ، فى أخر 20 سنة حصل تقدم كبير في تكنولوجيا صناعة النقود جعلتها أكثر أمانا و أقل عرضةً للتزوير ، لكن أساليب و فن التزوير كمان تطورت بشكل كبير و أصبحت أعقد بكثير عشان كده لسه فيه كّم كبير من العملات المزورة ، يتم تداولها داخل دوائر التداول النقدي ، حتى إن الفلوس المزورة بتتحرك من يد ليد بدون علم أي حد إنها مزورة ، طب ايه الحكاية ؟ و إزاي تم تزويرها بدون إكتشافها حتى إنها تكاد تكون نسخة طبق الأصل من العملة الحقيقية ؟ هل الموضوع حبر و ورق و خلاص ؟ طب العملة المزورة بتتكلف كام ؟ وسعرها فى السوق كام ؟ طب أستاذة تزوير العملات مين؟ وإزاى بيقدروا يعملوا عملات مزورة تقدر تخدع أجهزة كشف التزوير ؟ طب آلية عمل أجهزة كشف التزوير إيه ؟ طب هو فيه حد يقدر يفرق بين العملة المزورة والحقيقية بمجرد النظر او حتى اللمس ؟
تفكك أوروبا ... إقليم اسكتلندا كلمة السر
تعالى نحكى الحكاية ، في 1 يوليو 2021 سيدة كولومبية صرفت فلوس من ماكينة ATM موجودة فى الشارع تابعة لبنك banco caja social ، الفلوس كانت مرسلة ليها من زوجها بقيمة مليون بيزو كولومبي ، 20 ورقة من فئه 50,000 بيزو و المبلغ قيمته لا تتعدى 270 دولار أمريكي ، المفاجآة كانت رفض كل الناس للعملة بحجة إنها مزورة ، وده حصل في كل مكان حاولت تاخذ منه خدمة مقابل الفلوس سواء كان جزار أو بقال أو سوبر ماركت ، الحقيقة إن الفلوس فعلاً كانت مزورة ، فالست رجعت للبنك صاحب ماكينة ATM ، المفاجآة أنها مكنتش لوحدها اللى رايحة تشتكى ، كان غيرها كتير جداً رايحين يشتكوا من نفس المشكلة ، فالفكرة اللى بتقول إن من المستحيل تسحب فلوس من البنك مزورة مش مستحيلة ولا حاجة ، مش بس فى كولومبيا ، إنما فى دول كتير جدا وبالأخص دول أمريكا اللاتينية ، بس فى كولومبيا دي حاجة عادية جداً ، البلد دي من أكثر دول العالم نشاطاً في تزوير العملات ، لدرجة إنه لحد سنه 2010 كانت كولومبيا هى المصدر الأول للدولارات الأمريكية المزورة اللي بتدخل الولايات المتحدة وده لجودة العملات دى لدرجة إنها يتعدى على الأمريكان نفسهم ، ولبراعة المزورين الكولومبيين في تزوير الدولار ، مجلس الاحتياطي الفيدرالي الأمريكي أعاد تصميم عملة ال 100 دولار في أكتوبر 2013 لإضافة خصائص أمان جديدة ، يستحيل معاها التزوير ، بس الحقيقة إن حتى العملة الجديدة موقفش تزويرها ، لأن وببساطة المزورين هما كمان أضافوا خصائص الأمان الجديدة للعملة المزورة ، عشان تبقى شديدة الشبة بالعملة الحقيقية ، هندسه عكسية زى الكتاب ما بيقول ، بس مش بس المزروين الكولومبيين هما ماستر اللعبة دى ، لأن ماسترز تزوير العملات عالمياً هم البيروفين ( البيرو ) ويمكن سبب شهرتهم هى نفس العملة اللى مجلس الاحتياطي الفيدرالي الأمريكي بدء فى طباعتها فى 2013 ، ورقة 100 دولار بخصائص الأمان العالية.
فبحسب جهاز الخدمة السرية المسؤول عن مكافحة تزوير العملة وحماية الرئيس الأمريكي تقريباً 60 % من العملات الامريكية المزورة مصدرها البيرو ، الواشنطن بوست بتوصف نسخة Peruvian note - العملة المزورة في البيرو - بأنها أجود أنواع النقود المزورة على وجه الارض ، وده ببساطة لبراعة العصابات البيروفية في تزوير العملات الأمريكية لدرجة إن بعض العملات اللي بيزوروها بتعدي على المواطن والتاجر و ماكينات كشف التزوير و في بعض الأحيان البنوك كمان و محدش يكتشفها إلا مجلس الإحتياط الفدرالي - البنك المركزي الامريكي - .
طب إزاي الدولار بيتم تزويره رغم وجود خصائص الامان العالية ؟
الأكيد أنه فى طرق كتير جداً لتزوير العملات بس يمكن الطريقة الأشهر للعملة الأمريكية هى washed note - العملات المغسولة - ، اللي بيحصل إن المزورين بيجيبوا الفئات الصغيرة من العملات الامريكية من فئات 1 دولار أو 5 دولار ، و يتم وضعها في مذيبات كيميائية معينة عشان يمسحوا الطباعة الموجودة عليها ، وبعدها يطبعوا عليها فئات اكبر زي ال 100 دولار بإستخدام طابعات متطورة جداً ، بتطبع بتقنية الطباعة الملساء - offset - وبكده الورقة بقيمة 5 دولار تتحول لورقة بقيمة 100 دولار واللي بيساعد على كده إن كل فئات العملات الامريكية لها نفس الأبعاد من حيث الطول و العرض .
ويمكن تفضيل المزورين للطريقة دى بيرجع لأسباب كتيرة أهمهم :
1- الورقة المزورة بيبقى لها نفس ملمس الورقة الحقيقية 75% قطن مع 25% كتان .
2- على الرغم من مسح كامل الطباعة من على سطح الورقة إلا إنها بتحتفظ بأثنين من أهم خصائص الأمان وهما شريط الأمان والعلامة المائية .
3- الطريقة دى بسيطة جداً ومش مكلفة ومش محتاجة اكتر من 12 واحد للقيام بكامل المهمة من حيث التصميم والطباعة والتأمين وتوريد المواد الكيمياوية و الأحبار ، وبكده طباعة 5 مليون دولار متخدش أكتر من أسبوع .
لإنتاج ورقه 100 دولار فده بيكلف الحكومة الامريكية 4 سنت و بيكلف المزورين فى حدود 3 أو 5 دولار ، و تتباع فى السوق السوداء بحوالى 20 % من قيمتها يعني تقريباً مكسب في حدود ال 15 دولار للورقة الواحدة ، الجزء الأكبر من الدولارات المزورة يتم تداولها في أمريكا اللاتينية و جزء تانى يتم تهريبه للداخل الامريكى ، وده اللى خلى مجلس الاحتياطي الفدرالي يقول ان تقريبا 1% من كامل العملة الأمريكية المتداولة عالمياً البالغ قيمتها 1.15 تريليون دولار مشكوك فى إنهم مزورين يعنى تقريبا 11.5 مليار دولار مشكوك فيهم .
السؤال بقى إزاي المواطن العادي يعرف إذا كانت العملة مزورة ولا لاء ؟
الحقيقة إن أي عملة ورقية لها خصائص أمان security features ، واللى هى عبارة عن خصائص معينة يتم دمجها فى تصميم العملة عشان يبقى من المستحيل تزويرها ، الخصائص دى يمكن التعرف عليها بمجرد اللمس أو النظر.
فمثلاً ورقه ال 100 دولار امريكي يعتبر أبرز خصائص الأمان فيها هى
١- العلامة المائية وهى عباره عن صورة مدمجة في تصميم الورقة ، لا يتم رؤيتها إلا بوضع الورقة أمام مصدر للضوء و إذا كانت العلامة غير موجودة أو موجودة بدون تعريضها للضوء يبقى الورقه دي مزورة ، طب بالنسبه للنسخة البيروفية المزورة إزاى يتم تمييزها بالرغم من وجود علامة مائية أصلية ؟ على الرغم من إن ورقة 5 دولار المطبوع عليها فئة 100 دولار متطابقة مع ورقة 100 دولار بشكل كبير من حيث المظهر والملمس والألوان وحتى مع تغير زوايا الرؤية ، إلا أن هناك عيب ساذج جدا المزورين بيراهنوا على إن أغلب الناس مش هتلاحظه ، العيب ده ببساطة إن كل فئة من الدولار الامريكي لها علامة مائية مختلفة عن العلامة المائية للفئات الثانية ، العلامة المائية عادةً بتكون نسخة مصغرة من الصورة الكبيرة اللي على الورقة نفسها ، بس فى حالة 100 دولار المزورة صحيح إن الورقة فيها علامة مائية أصلية الا إنها مش العلامة الخاصة بورقة 100 دولار ، إنما علامة الورقة 5 دولار واللى بتكون علامتها المائية على الشمال عكس ورقة 100 دولار اللى علامتها المائية على اليمين ، فلو انتا لقيت ورقة 100 دولار علامتها على الشمال فهى غالباً برده شمال.
٢- خاصية الحبر متغير الألوان ، فى أسفل يمين ورقة 100 دولار النسخة القديمة - قبل 2013 - هتلاقى أن الرقم 100 بيتغير بين اللونين النحاسى والأخضر حسب زاوية الرؤية ، أما فى النسخة الجديدة - نسخة 2013 - فتم إضافة رسمة لجرس صغير ألوانه تتغير بين النحاسي و الأخضر حسب زاوية الرؤية.
٣- خيط الأمان وهو عبارة عن خيط عمودي شمال ورقة 100 دولار ، يظهر مع وضعها أمام مصدر للضوء ، ويصبح لونه وردي مع تعرض الورقة للأشعة فوق البنفسجية ، الشريط ده مكتوب علية 100 USA.
٤- الطباعة الغائرة ففى ورقة 100 دولار مثلاً و بالضبط أعلى كتف بنچامين فرانكلين المرسوم على الورقة هتلاقى الملمس خشن وده نتيجة لتقنية اسمها الطباعه الغائرة.
السؤال ليه اتكلمنا على ورقة 100 دولار بالخصوص ؟ لأنها أكثر العملات انتشاراً عالمياً و وبالتالى هى الأكثر عرضة للتزوير ، و عشان كده تم مناقشة أبرز خصائص الأمان فيها ، مع وجود خصائص أمان كتير تانية إلا إن ما تم مناقشته يظل هو الأبرز ، فمثلا ال 100 ريال سعودي فيها 10 خصائص أمان و ورقة ال 100 جنية مصري فيها 14 خاصية أمان ، مشروحين بشكل كامل على موقع البنك المركزي السعودي و المصرى .
طبعا بالنسبة للبنوك و محلات الصرافة و المحلات الكبيرة ، مفيش مجال لفحص الورق يدوياً ، عشان كده الاماكن دى بتلجأ للحلول التكنولوجية لكشف العملات المزورة وهم أحد خياريين
١- القلم الكاشف للعملات المزورة - counterfeit detector pen - اللى بيحتوى على صبغة اليود ، بعض العملات المزورة ورقها مصنوع من لب الخشب وده اللى بيخلى لون الورقة غامق ، و لتبيض العملة يتم غمسها داخل النشا ، النشا اللى بيتفاعل مع اليود الموجود داخل القلم فبمجرد رسم خط على العملة يظهر لونه باللون الازرق نتيجة للتفاعل الكيميائي ، بس مع قدرة بعض المزورين الحصول على ورق اصلي مصنوع من الكتان والقطن وعدم إحتياجهم للتبييض بالنشا فالقلم ده يعتبر غير فعال لكشف التزوير بدقة عالية.
 |
| جهاز فرز و عد العملات |
وده اللى تم تأكيده عام 2002 لما ظهرت نسخة مزورة من ورقة 100 دولار شديدة التطابق مع الأصلية حتى إن المخابرات الامريكية وقتها أطلقوا عليها إسم super dollar أجبرت ساعتها دول على تفعيل إجراءات إستثنائية فمثلا فى أيرلندا لقبول ورقة من فئه ال 100 دولار.
١- لازم يكون صاحبها عميل سابق للبنك .
٢- الورقة يتم فحصها من قبل الصراف ثم جهاز كشف العملات المزورة ، وكمان و متدخلش المنظومة النقدية إلا بعرضها على خبراء كشف التزوير لفحصها ، مع إلزامية تنفيذ هذه الإجراءات مع كل ورقة واردة .
السؤال بقى مع فشل أجهزة كشف العملات المزورة ، هل يستطيع الإنسان العادي كشفها ؟ ، 78 % من العملات المزورة المكتشفة في كندا اللي إتعرف عليها كانوا افراد و أصحاب محلات مشاريع ، من الآخر كده الشخص اللي بيتعامل مع العملة كثير و عارف خصائصها يقدر يميزها بمجرد لمسها.
- تفكك أوروبا ... إقليم اسكتلندا كلمة السر
- سلاح الصين الذى أرعب أمريكا
- قصة صعود BMW
- مؤشر احمر الشفاه ودلالات الركود الاقتصادى
- كذبة الجمعة البيضاء , قال تخفيضات قال !!
- إنهيار الأقتصاد الألمانى ... هو ده لو حصل ..ياترى الماطن العربى هيتأثر؟
- أسرار و حيل التجار عشان ياخدوا فلوسنا
- الاسعار هتوصل لفين فى ٢٠٢٢
- صعود رولز رويس ... العلامة البريطانية
- رولز رويس ... الإفلاس و العودة
تعليقات
إرسال تعليق