العملات الرقمية ... الوجه الآخر
العملات الرقمية ... الوجه الآخر
إيه العلاقة بين العملات الرقمية زى البتكوين والحروب والصراعات ، وهل العملات الرقمية قادرة على إحياء إضطرابات في دول و دعم ناس فى حروب ؟ الحقيقة إن العملات الرقمية لها قصة كبيرة جداً ، قصة فى كل دولة ، و زى ما كل دولة لها خصوصية ، فنتائج وأسباب علاقتها بالعملة الرقمية بتتغير من دولة لدولة .
أثناء شهر يناير 2022 شهدت كازاخستان الدولة اللي سكانها 19 مليون نسمة في آسيا الوسطى موجة من الإحتجاجات بسبب رفع الحكومة لأسعار الغاز بشكل مفاجئ و لتدنى الأوضاع الإقتصادية ، الإحتجاجات بدأت في الغرب و بعدين إنتشرت فى الدولة كلها ، وتطورت لإشتباكات عنيفة بين المحتجين و قوات الشرطة والجيش ، أدت لمقتل أكثر من 160 شخص وإعتقال الآلاف بحسب وسائل إعلام محلية ، الإحتياجات اللي خسائرها تجاوزت 200 مليون دولار ، واللى اعُتبرت أسوء موجة إحتجاجات تشهدها الدولة السوفيتية السابقة منذ إستقلالها عام 1991 ، الحكومة الكازاخستانية قطعت النت و الإتصالات السلكية و اللاسلكية عن البلد بالكامل لإحتواء الإضطرابات وده كان له تأثير مضاعف على سوق العملات الرقمية العالمية وتحديدا البتكوين ، اللى تراجعت أسعاره لأدنى مستوياته من سبتمبر 2021 ليفقد حوالى 8% من قيمته و ينزل سعره لأقل من 41 ألف دولار لكل بتكوين ، واللى وصل قبلها سعره فى مارس 2021 لأكثر من 60 الف دولار ، يعنى فى أقل من سنة ، وسط توقعات وقتها أنه رايح فى سكة 100 ألف دولار ، السؤال البديهى هنا ، طب إيه علاقة قطع الإتصالات في كازاخستان بالعملة الرقمية ؟
بداية من سنة 2021 و كازاخستان أصبحت ثاني أكبر دولة لتعدين البتكوين بعد الولايات المتحدة وبالتالي توقف أنشطة التعدين فجأة نتيجه قطع الإتصالات هيخلق مشكلة فى سوق العملات الرقمية ، المشكلة اللى مش سببها قطع النت بس إنما كمان إنقطاع إمدادات الطاقة الكهربية بشكل متكرر فى كازاخستان ، البلد اللي بقت بتلعب دور مهم في عالم العملات المشفرة الرقمية ، بس قبل ما نعرف إيه علاقة كازاخستان بالعملات الرقمية وإزاى بقت الدولة رقم 2 فى تعدين أقوى و أشهر العملات المشفرة ، فالأول لازم نعرف إيه هو تعدين العملات الرقمية أصلاً ؟ وليه التعدين بيستهلك كمية كبيرة من الكهرباء ؟ و إزاي الصين خلت ده ممكن ؟ وايه معضلة الفحم و الكهرباء فى كازاخستان و اللى كانت السبب الرئيسي فى الإحتجاجات ؟ وكمان إيه تأثيرها على سوق العملات الرقمية في العالم كله ؟ مقال النهارده بيتكلم عن كازاخستان وعلاقتها المريبة بالعملات الرقمية المشفرة .
أولاً : البتكوين عملة غير مركزية لا تخضع للإشراف من أى جهة حكومية أو بنوك مركزية تقليدية ، والسبب فى تسميتها مشفرة بترجع لطريقة التصميم الذكى المعمول لمنع السرقة واللى له آلية عمل محددة و ذكية جداً ، فكل جهاز في شبكة البتكوين بيكون فيه زي سجل كامل بمعاملات العملاء ، السجل المعروف بسلسلة الكتل block chain ، معنى كده إن كل جهاز موجود في الشبكة بيقدر يراقب كل التحويلات من شخص لشخص فى أى مكان فى العالم وده للتأكد من صحة المعاملات لمنع الإحتيال زي مثلا عمل نسخ لنفس العملة و إعادة إرسالها لأكثر من شخص فى نفس الوقت ، لأنها عملة رقمية غير ملموسة زى العملة التقليدية - ورق البنكنوت - ، وبكده كل كمبيوتر موجود على الشبكة مطلوب منه التأكد من سلامة العمليات عن طريق حل معادلات رياضية معقدة وكمان مراقبة وإضافة كتل جديده لسلسلة الكتل block chains , وهى دى عملية التعدين .
إقرأ أيضاً : حرب المخابرات مع عصابات تزوير العملات
رجال التعدين يطلق عليهم عمال المناجم ، هما أشخاص بيتنافسوا بينهم بحيث أسرع عامل ينجح في التعدين ويقدر يضيف سلسلة جديدة يتم منحه جائزة ، الجائزة اللى عبارة عن عملات بتكوين واللى بتوصل دلوقتى ل 6,25 بتكوين لكل سلسلة كتل جديدة ، فى الشبكة الضخمة دى كل 10 دقائق يتم إضافة سلسلة جديدة ، وده معناه حسابات ومعادلات رياضية معقدة أكثر ، النظام المعقد و العبقري ده تم تصميمه من مجهول تم تسميته Satoshi nakamoto ، العملية المعقدة دى لازمها عمال مناجم مهرة - أساتذة فى مجال الكمبيوتر - فلازمهم أجهزة كمبيوتر قوية جدا بإمكانيات عالية عندها القدرة على إجراء آلاف وملايين وحتى مليارات من عمليات الحوسبة في الثانية ، و بالتالى ده عايز كميات كبيرة من الكهرباء وكل ما زادت إمكانيات الأجهزة كل ما زادت فرص حل المعادلات بشكل أسرع ، وده السبب فى إن عمال المناجم عندهم مستودعات عملاقة فيها النوع ده من الكمبيوترات والأجهزة ، ومع إرتفاع قيمة العملات المشفرة ، وبالتالى زيادة الأرباح فناس جديدة تنضم للنادى ده وبكده يزيذ عمال المناجم و يزيد معاها المستودعات وكمان يزيد الضغط على شبكات الكهرباء ، الإستهلاك اللى تضاعف عشرات المرات فى أخر 5 سنين ، وصل دلوقتى 116 ترليون واط في السنة ، يعني بنتكلم تقريبا عن 0.05% من إجمالي الكهرباء في العالم ، وده إستهلاك يفوق إستهلاك دول كاملة .
إستهلاك عمال المناجم لكميات الكهرباء الضخمه دي يأخذنا لعلاقة الصين بالقصة ، لحد مايو 2021 الصين كانت أكبر حاضنة لعمال المناجم فى العالم ، لكن ده بدأ يتغير لما الحكومة الصينية بدأت في إتخاذ إجراءات صارمة ضد تعدين و تداول البتكوين ، وبالتالي بدأت المقاطعات الصينية في طرد عمال المناجم من عندها و فى سبتمبر 2021 بنك الشعب الصيني - البنك المركزي الصيني - منع تداول وتعدين العملات المشفرة بكل أنواعها على الأراضى الصينية مع تشديد العقوبات على مخالفين القانون ، السؤال بقى إيه هو السر وراء موقف بكين المعادي للعملات المشفرة و البتكوين بالتحديد
1- النظام الصينى وجد صعوبة فى السيطرة على النوع ده من الأسوق لأنها زى ما قلنا غير مركزية وغير منظمة و متقلبة ويمكن تحريكها حول العالم لدعم نزاعات و تأجيج إضطرابات بعيدا عن المراقبة الصينية المتشددة ، و ده اللى أكده Jim earmer مدير صندوق التحوط السابق في كلامه لمجلة الغارديان البريطانية لما قال إن الحكومة الصينية تعتبر العملات المشفرة حاجة خارجة عن السيطرة ، و بالتالي تشكل تهديد مباشر على النظام الصيني ، و لذلك الصين إتخذت خطوة كبيره في اليوان الرقمى كبديل رسمي للعملات الرقمية و لكن تحت السيطرة الصينية المباشرة .
2- الصين تعاني من أزمة كهرباء كبيرة و تعتمد على الفحم لتلبية الطلب المتزايد على الطاقه الكهربائية ، وده يضر بخطط بكين لتقليل الإنبعاثات الكربونية ، ولأن البتكوين بيستهلك كميات كبيرة من الكهرباء كان بيضغط على الشبكة الكهربائية الصينية ويقلل كفاءتها ويزيد من إنقطاع التيار الكهربي وبالتالى يزيد العجز في تلبية الطلب المتزايد لإمدادات الطاقة الكهربية .
3- زيادة النفايات الإلكترونية من أجهزة التعدين اللى ظهر منها أجيال أحدث وأسرع ، ده اللى إستوجب تحديثها بإستمرار و بالتالى التخلص من الرقائق والشرائح الإلكترونية البطيئة و ده يزيد الضغط على البيئة الصينية فى ظل معاناتها خلال العقدين الأخيرين ، و من هنا بدأت واحدة من أكبر هجرات عمال المناجم فى العالم وتحديداً من الصين ، الهجرة اللى أطلق عليها هجرة التعدين الكبرى The Great Migration ، و فى محاولة من العمال للعثور على أرضى جديدة تتمتع بأسعار كهرباء رخيصة على إعتبار إنها التكلفة المتغيرة فى عملية التعدين .
السؤال بقى مين أقرب دوله للصين و غنية بالفحم و أسعار الكهرباء فيها رخيصة ؟ بالضبط كده كازاخستان اللي تقع في الشمال الغربي للصين و اللى أصبحت البديل الجذاب لعمال المناجم بعيداً عن قبضة الصين الأمنية خاصةً و إن الحكومة الكازاخستانية في العادة تسهل البناء على أراضيها و دا مهم جداً لعمال المناجم اللى يحتاجوا بناء منشآت ومستودعات كبيرة لإحتواء أجهزة التعدين في أسرع وأقل وقت ممكن ، بالإضافة لترحيب الحكومة الكازاخستانية بعمال المناجم على أمل الإستفادة من عوائد التعدين ، فطبقاً لبيانات تم جمعها من قبل مجلة financial times في نوفمبر 2021 ، هناك 14 شركة من أكبر شركات تعدين البتكوين في العالم نقلت أكثر من 2 مليون جهاز تعدين خارج الصين بعد قرار الحظر ، معظم هذه الأجهزة تم نقلها للولايات المتحدة و كندا و كازاخستان وروسيا ، فعلى سبيل المثال شركتين BTCM و bit fu fu للتعدين الرقمى نقلوا لكازاخستان تقريبا 88 ألف جهاز تعدين ، وبناء على دراسة فى ديسمبر 2021 عملتها جامعة كامبريدج قالت إن أمريكا رقم واحد في تعدين العملات الرقمية بنسبة 35.4 % و يليها كازاخستان بنسبة 18.1% بعد ما كانت 7.4% في مايو 2020 و روسيا 11.2% و كندا 9.6% .
لذلك تأثرت أسوق العملات الرقمية بمجرد فصل النت عن الأرضى الكازاخستانية بسبب الإحتياجات ، الحقيقة أنه التحديات اللى بتواجه عمال المناجم كتير جدا فى كازاخستان أهمها هى إمدادات الكهرباء لأن الطلب على الكهرباء أصبح يفوق العرض في بعض الأوقات و بالتالى حصل ضغط على الشبكة الكهربية بسبب عمليات التعدين اللى أدى لإنقطاع الكهرباء عن مدن و قرى كازاخستانية بدايةً من شهر أكتوبر 2021 ، دفع كازاخستان ساعتها لطلب المساعدة من روسيا لإمدادها بالكهرباء في نوفمبر 2021 ، وزارة الطاقة الكازاخستانية بتقول إن الطلب على الكهرباء زاد بنسبة 8% من منتصف 2021 و بالتحديد مع توافد عمال المناجم من الصين ، ودى زيادة ضخمة مقارنةً بالزيادة المتوقعة اللى كانت تتراوح ما بين 1 إلى 2 % سنوياً ، وبتقول إن عمال المناجم بيستهلكوا تقريبا 48% من إجمالى الطاقة الكهربية في كازاخستان .
و بسبب مشاكل إدارية و تهالك شبكة الكهرباء اصبحت البلد تعاني من نقص كبير في إمدادات الكهرباء واذا ما إستمر الوضع بهذا الشكل و فى ظل الإحتجاجات التي تجتاح البلاد و إتهام الحكومة لعمال المناجم بصنع أزمة فى إمدادات الكهرباء فالأكيد إن عمال المناجم هيبحثوا عن أرض جديدة غير كازاخستان .
برأيك هل يستمر المزيد من عمال المناجم فى الهجرة إلى كازاخستان أم منها ؟ وهل تعتقد إن العملات الرقمية ستحل محل العملات التقليدية قريباً ، وهل تعاملت بالعملة الرقمية قبل كده ؟
تعليقات
إرسال تعليق