تفكك أوروبا ... إقليم اسكتلندا كلمة السر
تفكك أوروبا ... إقليم اسكتلندا كلمة السر
نفط اسكتلندا ، في الستينات تم العثور على كميات كبيرة من النفط في بحر الشمال فى المنطقة الواقعة بين النرويج وبريطانيا ومع دخول السبعينيات بدأت عمليات استخراجه وبيعه ، النفط اللي كان يخص بريطانيا المفروض إنه واقع في منطقه تابعة لاسكتلندا ، فالمفروض ان الاسكتلنديين يستفيدوا اكثر من عائدات النفط لكن مش ده اللي حصل وفضل حالهم كما هو عليه من إرتفاع للبطالة و التضخم يمكن كمان بشكل أكبر من باقي مناطق بريطانيا الثانية ، وكبرت الأزمه مع حرب 1973 و ازمة النفط اللى رفعت اسعاره.
إقرأ أيضاً
: سلاح الصين الذى أرعب أمريكا
الكلام ده سبّب غضب كبير ما بين الاسكتلنديين وطالما فيه غضب شعبى يبقى فيه سياسيين هيعرفوا يستغلوا الغضب ده ، وبالفعل هو ده اللى حصل لما الحزب الوطني الاسكتلندى عمل حملة بعنوان - إنه نفط اسكتلندا - وإن الاسكتلنديين مش هيستفيدوا حاجة من نفطهم طالما إنهم جزء من بريطانيا ، والحل هو الإنفصال عن بريطانيا والإستقلال بدولة اسكتلندا الجديدة ، ومن الوقت ده بدأت شعبية الحزب في الإرتفاع و إستمرت لحد وقتنا الحالي عشان يصبح الحزب ده هو الحزب الأكبر في اسكتلندا ، و هو أيضاً الداعي الأكبر للإنفصال ، الإنفصال اللي أصبح قريب جداً جداً دلوقتى اكتر من أى وقت فات ، الإنفصال اللى لو حصل فعلاً فالمؤكد إن بريطانيا اللى نعرفها كلها هتتغير و للأبد ، بس الإنفصال ده هيبقى ايه تبعاته على بريطانيا و إزاي الحدث ده خطير جدا ؟ و ايه إحتمال أنه نبدأ نسمع الكلام ده في الشهور الجاية ؟ وهل هيمثل خطر كبير على بريطانيا ؟
إقرأ أيضاً
: صعود رولز رويس ... العلامة البريطانية
بس الاول الحكايه لها بداية.... تاريخ بريطانيا ... إيه هي بريطانيا ؟ هى إتحاد بين اربع مناطق ( أقاليم ) هم إنجلترا و ويلز و اسكتلندا و أيرلندا الشمالية ، تاريخ الاقاليم دي إمتاز بالحروب والدموية المفرطة على مدار مئات السنين ، عمرهم ما كانوا متحدين غير في آخر 300 سنة تقريباً وبالذات إنجلترا واسكتلندا ، ويمكن ده اللى وضحه فيلم brave heart لما قدم وقتها معاناة الشعب الاسكتلندي وقصة كفاحه ، لكن الحروب هدأت وبدء يحصل تزاوج سياسي - بين أفراد العائلتين الملكية فى إنجلترا و اسكتلندا - و لحد ما و صلنا لسنة 1603 ، في السنه دي ماتت الملكة اليزابيث ملكة إنجلترا وما كانش ليها وريث شرعى غير إبن عمها الملك جيمس السادس اللى كان ملك اسكتلندا وقتها ، ومن هنا أصبح هو ملك إنجلترا بالوراثة و تم توحيد التاجين الاسكتلندي والإنجليزى ، مع إحتفاظ كل إقليم منهم ببرلمانه و قوانينه الخاصه بدون اى خلط ، و فضل النظام ده معمول بيه كمان 100 سنه لحد ما الاسكتلنديين عملوا مستعمرة فى بنما على سنة 1690 واللى بسبها اسكتلندا وقعت فى أزمة مالية كبيرة مع تراكم ديون كتيرة وما كانش حد يقدر ينقذها من الوضع المتأزم ده غير إنجلترا المعروفة وقتها بثراؤها الفاحش فحصل إتحاد بين الإقليمين سنة 1707 عشان يبقوا مملكة واحدة بنظام واحد و برلمان واحد ، للعلم وقتها كانت دى فرصة حلوة أوى للاسكتلنديين مش بس على المستوى السياسى و إنما على المستوى الاقتصادي كمان لأن بالشكل ده هيقدر الاسكتلنديين يتاجروا بحرية فى المستعمرات الإنجليزية المنتشرة فى كل مكان ، لحد هنا احنا بنتكلم عن انجلترا و اسكتلندا و ويلز مع بعض لهم برلمان واحد ونظام واحد وكان معهم أيرلندا اللى احتفظت لنفسها بنظام ثاني مختلف ، صحيح إن الملك واحد بس إيرلندا مازالت مستقلة نسبياً وعلى سنه 1801 أيرلندا انضمت بشكل كامل للمملكة عشان يبدء عهد جديد ، عهد الإمبراطورية التى لن تغيب عنها الشمس لاكتر من 150 سنة ، المملكة المتحدة.
إقرأ أيضاً
: قصة صعود بى ام دبليو
متحدين اه إنما بينهم مشاكل و اختلافات كتير ، و خاصةً مشاكل أيرلندا اللى هتلاقيها بشكل كبير مشاكل دينية مذهبية بين كاثوليك و بروتستانت و زوّد عليهم مشاكل ثقافية وقومية ، ود اللى ممكن يلاحظه اى حد مقيم في بريطانيا من حيث الإختلاف الكبير حتى بين اللهجات والأهم هو إعتزاز كل شخص من الأقاليم الأربعة للمملكة او الاقليم المنتمى له اكثر من أى إقليم بريطاني تانى ، الكلام ده يؤيده استطلاع رأي إتعمل سنة 2021 من قبل موقع panel base اللي قال أن 33 ٪ من الاسكتلنديين بيشعروا أنهم اسكتلنديين اكتر من كونهم بريطانين .
كله كوم وموضوع النفط ده كوم ثاني ، ليه ؟ لان 90 % من النفط البريطاني بالأساس فى مناطق اسكتلندية و 65 % من الغاز بريطاني هو غاز اسكتلندا برده ، أحد مراكز الأبحاث قّدر الاحتياطيات الاسكتلندية من النفط و الغاز باكثر من 4 ترليون جنية استرليني وقتها و اللى تقدر تقول عليه دلوقتى 2 ترليون جنيه استرليني فى ظل إنخفاض أسعار النفط عالمياً وده رقم ضخم جداً ، وده سبب خوف للحكومة البريطانية جدا لدرجة إنهم وفى سنة 1974 طلبوا من أستاذ الاقتصاد Gavin MCcrone إنه يعمل بحث عن إمكانيات النفط ده على مستقبل الإقتصاد الاسكتلندي في حال قررت اسكتلندا الإنفصال ، و الوضع هيكون عامل ازاى ؟ الراجل كتب تقرير و قال فيه ان اسكتلندا هتكون أقوى دولة أوروبية من حيث الوضع المالي ، و عملتها هتكون الأقوى و هتبقى عملة ملاذ آمن ضد الإضطرابات والأزمات الإقتصادية ومش بس كده إنما كمان البنوك الاسكتلندية هتكون مصب ثروات العالم كله بسبب عملتها القوية ، و ذكر إيجابيات كثير عن الإقتصاد الاسكتلندي ، وبعدها الحكومة أمرت بحفظ التقرير و وسّمه بشعار ( سري للغاية ) وفضل لغاية 2005 طى الكتمان لحد ما بريطانيا عملت قانون جديد لحرية المعلومات ، وبعدها التقرير شاف النور.
إقرأ أيضاً
: كذبة الجمعة البيضاء , قال تخفيضات قال !!
طب ليه كان سري ؟ لأن ظروف ظهور التقرير كان هيدعم وقتها النزعة الإنفصالية الكبيرة عند الاسكتلنديين اللي كانوا تعبانين جدا في الوقت ده ، ولكن مع ذلك كان في ناس كثير غير Gavin MCcrone عارفين قيمة النفط الاسكتلندي وكانوا شايفين إن عائدات النفط هي السبب في النهضة الإقتصادية اللي عملتها مارجريت تاتشر رئيس وزراء بريطانيا وقتها لكن إعادة توزيع عادات النفط على الأقاليم و إستخدامها كان لا يصب في مصلحة الاسكتلنديين بالقدر الكافي وده خلى الحركات العمالية و مشاكلها تزيد في اسكتلندا.
اسكتلندا بدأ يظهر فيها النزعة الإنفصالية بشكل واضح مع بداية الثلاثينات وفضلت تكبر تكبر لحد ما وصلنا السبعينيات و الثمانينيات ، فى الوقت ده الإمبراطورية البريطانية التي لا تغيب عنها الشمس كانت اإتهت ، وده زود إحساس الاسكتلنديين إنهم لما يكونوا منفصلين عن بريطانيا هيكونوا في وضع أفضل بكثير ، خاصة مع عدم وجود تمثيل قوي للاسكتلنديين في البرلمان البريطاني يعني من اصل 650 مقعد في البرلمان البريطاني 59 مقعد فقط للاسكتلنديين ، وده في نظر بعضهم قليل جدا والبعض الثاني شايف ان هم بيدفعوا ضرائب كثير و بياخدوا خدمات قليلة بسبب الإنفاق الحكومى الضعيف فى الإقليم ، الكلام ده لعب عليه القوميين اللي بيمثلهم الحزب الوطني الاسكتلندي كويس أوى وفضل يضغط على الحكومة البريطانية لحد ما وصلنا سنه 1997 وبعد إستفتاء اتعمل في اسكتلندا على نيل اسكتلندا مزيد من التفويض لإدارة إقليمهم بشكل مستقل ، اسكتلندا اصبح لها برلمان خاص واللي يقدر ياخذ قرارات في كثير قوي من الملفات بعيداً عن الحكومة البريطانية.
إقرأ أيضاً
: إنهيار ألمانيا .. نذير شؤم على الأوروبين
الحكومة البريطانية كانت مفكرة في الوقت ده إنها بالشكل ده هتقضى على الأحزاب ذات النزعة الإنفصالية في اسكتلندا لأن الأحزاب الكبيرة زي المحافظين والعمال مثلاً هم بالتأكيد اللي هيبقوا أغلبية فى البرلمان الاسكتلندي الجديد وبالتالي هيقضوا تماماً على فكرة الانفصاليين ، ليه ؟ لأن اسكتلندا لو قررت تنفصل فلازم الأول البرلمان الجديد يسن مشروع قانون - لعمل استفتاء - واللى لازم يتم الموافقة علية بأغلبية داخل البرلمان وبعدها يتم تحويله لإستفتاء شعبي ، وده مستحيل يحصل مع وجود حزبى العمال والمحافظين كأغلبية داخل البرلمان ، وده هيقضى على اي فرصة من الاساس إن مشروع الإستفتاء يتجاوز جدران البرلمان الجديد ، وفعلا توقع الحكومة البريطانية كان صحيح ومع أول برلمان سنه 1999 تمثيل الحزب الوطني ( حزب الإنفصاليين ) كان قليل جدا ، بس مع الوقت ومع كل دورة برلمانية جديدة الحزب الوطني كان بيكسب أرض جديدة ويزيد من عدد أعضاءه داخل البرلمان ، لحد ما وصلنا سنه 2011 واللي فيها وصلت نسبة الحزب الوطنى الاسكتلندي في البرلمان ل 53 % و بعدها تم تمرير مشروع القانون ، اللى أجبر الحكومة البريطانية على الانصياع للقانون ، و اتعمل إستفتاء الانفصال سنه 2014 وكانت النتيجة إن 55 % من الاسكتلنديين رفضوا فكرة الإنفصال ، و بالتالي حُسم الجدل ، لكن بعد سنين يحصل إستفتاء في بريطانيا كلها للخروج من الاتحاد الاوروبي المعروف Brexit وكانت النتيجة هى خروج بريطانيا من الإتحاد الاوروبي بعد موافقة ما نسبته 52% من البريطانين.
وده سبب مشكلة جديدة للاسكتلنديين لأن 62 % منهم كان رافض لفكرة الخروج من الإتحاد الأوروبي ، وده عكس النتيجة الإجمالية لعموم الشعب البريطاني واللى بتعكس إختلاف وجهات النظر بين اسكتلندا وبقية بريطانيا ، ومن هنا فكرة إنفصال اسكتلندا عن بريطانيا بدأت ترجع تانى لواجهة الأحداث ، مع أمل إعلان اسكتلندا كدولة مستقلة وبعدها تنضم من تانى لدول الإتحاد الاوروبي ، ولحد النهاردة و بعد مرور أكثر من خمس سنين ما زالت اسكتلندا فى الدوامة دى.
طب ليه دلوقتى بنتكلم في الموضوع ده ؟ لان الوزيرة الاولى لاسكتلندا Nicole stugeon طلعت فى ديسمبر 2021 وقالت إنها هتمشي في إجراءات عمل استفتاء إنفصالى تانى قبل نهايه 2023 ، و ده اللي خلى رئيس الوزراء البريطاني بوريس جونسون يرد عليها بأن النوع ده من الاستفتاءات لا يتم إلا كل جيل اى بعد فترة معتبرة تتراوح ما بين 10 إلى 40 سنة ، كل ده عامل مشاكل كثير جوا بريطانيا و مشاكل أكثر هتبدأ في الظهور الفترة الجاية ، لأن الحقيقة بتقول إن موافقة الحكومة البريطانية على الاستفتاء أو عدمها غير ملزمة للجانب الاسكتلندى.
إقرأ أيضاً
: كيف تحافظ على أموالك من الحيل التجارية
وكمان الاسكتلنديين ممكن يمشوا فى الإجراءات من جانب واحد على الاقل ، و على مستوى البرلمان الاسكتلندي بدون عمل استفتاء شعبي ، وبعد كده الكلام يكون على أرض الواقع وتبدأ المفاوضات بين الجانبين حسب وجهه نظر الكل ، كل ده معناه وجود إعلانات وترويج كل فريق لفكرته وهو بالفعل اللي حاصل على أرض الواقع و من سنين ، و بالتأكيد الرأي العام هو الوحيد القادر على الضغط على الحكومات ، وعلى حسب إستطلاعات الرأي فإن إحتمالية الانفصال مرشحة وبقوة خاصة بعد الاستطلاعات اللى بتقول إن 55% مؤيدين للإنفصال ، مع إحتمالية زياده النسبة مع الوقت ، و ساعتها مش هتكون اسكتلندا اخر المنفصلين عن بريطانيا لأن أيرلندا الشماليه ساعتها هتنفصل هى كمان ، خاصة وأن الأيرلنديين كانوا ضد فكرة خروج بريطانيا عن الاتحاد الأوروبي فى استفتاء Brexit ، واللى بيدعم ده حقيقه إن طريق أيرلندا هيكون أسهل من طريق اسكتلندا ، لأن خطتهم هتبقى الخروج من بريطانيا وبعدها العودة الى أيرلندا اللي هي دولة في الاتحاد الاوروبي و بكدة المملكة المتحدة هتتغير عن شكلها اللي نعرفها بيه النهاردة.
بإنفصال ايرلندا وكمان اسكتلندا وبقاء فقط انجلترا و ويلز ، هيُعاد تشكيل خريطة جديدة لبريطانيا ، وفي النهاية الكلام عن بريطانيا مهم جدا ، هى مش دوله عادية ولكنها بريطانيا اللاعب الأبرز عالمياً والمؤثر الكبير على الساحة الدولية و الأوروبية لسنين بل لعشرات السنين ، آخر إمبراطورية على الارض ، وبإنفصال أقاليمها ، فالحقيقة إن ده هيفتح باب كبير على كل دول أوروبا و الأقاليم الساعية للإنفصال زى إقليم الباسك فى أسبانيا ، وإقليمى لومبارديا و فينيتو فى إيطاليا ، و مقاطعة فلانديرز فى بلجيكا ، خطوة من الممكن تساهم وبشكل كبير فى تغير الخريطة الجغرافية و السياسية لقارة أوروبا كلها ، بس خلينا نشوف إيه اللي هيحصل السنين الجاية.
برايك هل تعتقد خروج اسكتلندا هيحصل ؟ وما هي تبعات إنفصال اسكتلندا أوروبياً و عالمياً ؟
شاركنا برأيك
الكاتب م . محمد توفيق
المراجع
اسكتلندا هتنفصل دا احتمال كبير من رأيى ..
ردحذفممتاز
ردحذف