الاسعار هتوصل لفين فى ٢٠٢٢

م . محمد توفيق -

الاسعار هتوصل لفين فى ٢٠٢٢



لا تنسى الإشتراك فى ميون تون : قناة يوتيوب معلومات شيقة فيديوهات قصيرة

انتا عارف لما ست الكل تورث وتجيب ورثها تقوم تشبرق عليكم فى البيت وتقوم جيبالك عربيه وعشان انتا عمرك ما اتعودت على كده ، مع اول غرزه تسمع الجمله المشهورة اكيد الحاجه اللى جيبهالك ، اهو ده بالضبط اللى ماما امريكا عملته فى العالم استلفت من طوب الارض وقاعدت تشبرق على شعبها بشيكات تحت مسمى خطة الإنقاذ الأمريكية American rescue plan , اكتر من 1,9 تريليون دولار امريكا وزعتها على المواطنين فى إطار محاولتها لإنقاذ الاقتصاد الأمريكى من تبعات ازمه كورونا ، يقوم بقى المواطنين الأمريكان يعملوا اول غرزه زى ما انتا عملت كده بالعربيه الجديده ، يقوم العالم كله يلبس فى حيطة ، الحيطة دى هى ارتفاع أسعار البضائع المخيف اللى جاى ، اقولك ليه بقى الحكايه بتبتدى لما المواطن الأمريكى قعد فى البيت بسبب ازمه كورونا أثناء فترة الإغلاق العالمى والرعب اللى حصل فى ٢٠٢٠ ، قام طبعا بدء يوجهه كل مدخراته عشان يشترى الحاجات الأساسية بس ، ويقلل الانفاق على قد ما يقدر .

تقوم الحكومه الامريكيه تخاف من أنه يحصل حاله ركود ، يقوم الكونغرس يقر خطة الإنقاذ الأمريكية اللى زى ما قلتلك كده يالا بينا  نستلف عشان ندى زوبه زقه ، يقوم المواطن الأمريكى بعد ما مسك الفلوس فى ايده يقولك الله ، ما هى الحياه حلوه اهيه ، يبدء بقى كمان يطلع من اللى كان حوشه عشان خايف من كورونا ، ويبدء بقى يصرف ، ما هو قاعد فى البيت محبوس بسبب كورونا ، طب نشترى ايفون جديد ، طب كمبيوتر ، طب نشترى اكسسوارات ، طب اكل وده كله اونلاين طبعا  ، هوب بدء يفرتك الفلوس ، ويشترى من الصين على قد ما يقدر بقى ما الفلوس كتير ، تبدء سفن الشحن اللى جايه من الصين عليها  الايفون ، كمبيوترات ، اكسسوارات ، الخ توصل امريكا وعشان ترجع تانى للصين شركات الشحن تقولك الله طب وايه لازمتها ارجع الحاويات فاضية على الصين طب ما أنا اسبيها فى الموانئ الأمريكية والأوروبية وارجع محمله بس بالحاويات اللى فيها بضاعه راجعة للصين .

يقوم من كل ١٠٠ حاويه طالعة من الصين عشان تروح امريكا ،او اوروبا ، يرجع منها ٤٠ بس للصين ، اه ما هو شركات الشحن مش هتشيل حاويات فاضيه عشان كمان تزود وزن السفن فى البحر وبالتالى هتزود فلوس بنزين السفن ده عشان ترجع للصين ومش هقعد أنا استنى لما الموانئ الأمريكية تفضيلى الحاويات اللى اصلا مش هيرجع فيها حاجه للصين ، يبقى الأوفر ليا اسيبهم فى ميناء كاليفورنيا و ميناء لوس انجلوس وارجع أنا على السريع اللحق اجيب اللى اجيبه من الصين عشان الأمريكان طالبين لسه حاجاااات كتير.

 إقرأ أيضاً : مصير أوروبا ... الإتحاد المنهار

الموانئ الأمريكية اصلا معروفة أنها بطيئه فى اجرائات التخليص الجمركي . وكمان الحاويات محتاجه عربيات نقل ثقيل عشان تتحمل عليها وامريكا اصلا عندها عجز فى سواقين النقل الثقيل باكتر من ٨٠الف سواق .
وعليه عمك جو بايدن ، فى  13 اكتوبر ٢٠٢١ يكلف ميناء لوس أنجلوس أنهم يشتغلوا ٧ ايام فى الأسبوع ٢٤ ساعه فى اليوم ، عشان نلحق نفضى السفن اللى جايه وعليها بضائع ، وبرده فى ١٧ اكتوبر ٢٠٢٠ شركات الشحن تعيط وتقولك أنه ليها اكتر من ٨٠ سفينه شحن حاويات واقفين قدام شواطئ ميناء لوس انجلوس مش عارفين يتفضوا ، ومعاهم بضاعه معديه ٢٥ مليار دولار ، يقوم الميناء يرد عليهم أنه فى تكدس رهيب للحاويات فى الميناء وكمان مفيش عربيات نقل تقيل كافيه تاخدهم ، والسفينه اللى كانت بتتفرغ فى ٤ ايام بالكثير ، بقت تاخدلها اسبوعين .
تقوم شركات الشحن تقولك الله ، هو أنا هشيل الشيلة لوحدى ولا ايه ، تقوم ترفع اسعار الشحن عشان سعر شحن الحاويه توصل ٢٠ الف دولار بعد ما كانت ألفين دولار قبل أزمة كورونا ، وكمان شغاله قطاعى يعنى مش عايزين يرتبطوا بعقود توريد طويلة الأجل ، وبقت بطلع سفنها للى يدفع اكتر 
اللى زاد وغطى بقى أنه كمان البحاره اللى على السفن دى بقالهم سنتين فى البحر رايحين جايين فى المحيطات ومفيش دوله موافقه أنها تنزلهم ارضها ، طبعا خوفا من أنهم يكون عندهم كورونا وده اللى أكده guy Platten  رئيس شركة الشحن الدولية لما بحار مات لظروف طبيعيه فى البحر واكتر من ١٢ دوله رفضت أنها تستلم جثته عشان تشحنها على بلده عشان يدفن فيها ، لحد ما طقم السفينة خافوا على جثته فقرروا يحفظوا الجثة فى  ثلاجه الفاكهه اللى موجوده على السفينه لاكتر من ٥ شهور ، وكل ما بحار يعرف ينزل بلده هوب فص ملح و داب .

تقوم شركات الشحن تسكت ، ابدا تقوم تقولك نزود فى عدد الحاويات على ظهر السفن اللى نعرف تشغلها ، والنتيجه أنه فى ديسمبر ٢٠٢٠ ويناير ٢٠٢١ اكتر من ٢٦٨٠ حاويه وقعوا فى البحر. 
تقول كده خلاص ، ابدا ، الصين تبدء توزع فى مساعدات ولقاحات لدول افريقيه ، وطبعا كل ده في ايه ، بالضبط حاويات ، تقوم نفس المشكلة تتكرر تانى بالضبط ، حاويات طالعه من الصين ، وتفضل فى الموانئ الافريقية ، ماهو احنا مش هنستنى حاويات فاضيه عشان ترجعها الصين لما ممكن نرجع الصين أسرع من غيرهم وبتكلفه أقل ونلحق مزادات تاجير سفن الحاويات .



كل اللى فات ده مشاكل بس الشحن والتفريغ فوق كل ده طبعا  كل الشركات اللى بتجيب مواد خام اسعار الخامات زادت عليها ، واسعار الشحن ، نسكت بقى على كده ، ابدا ، تقوم الصين تواجه نقص شديد فى إمدادات الفحم ، تقوم شركات مش لاقيه وقود ولا طاقه عشان تشغل مصانعها  . 
وكل ده يخلى الشركات فى الصين بتواجه نقص فى إمدادات الطاقه واسعار الشحن عاليه وبطء فى الالتزام بسبب نقص المواد الخام واسعارها الغاليه
تقوم البضاعه تزيد باكتر من ١٠,٧ ٪ عن سعرها القديم عشان تشيلها من ارضيه المصنع 
غير طبعا الزياده فى أسعار الغاز الطبيعى لاكتر من الضعف فى اقل من ٦ شهور. وكمان سوق الرقائق الإلكترونية اللى معطل الشركات الكبيرة أنها تلتزم بتوريد بضائعها . وطبعا كمان فى ديسمبر شهر الأعياد فى أمريكا وأوروبا ، يعنى طلبات اونلاين اكتر يعنى سفن شحن اكتر رايحه على هناك يعنى نقص اكتر فى الحاويات .
وبعدها عالطول فى شهر يناير وفبراير راس السنه الصينيه وأعياد الربيع ونقص البضائع اللى طالعه من الصين
كل ده يخلينا نشوف واحده من أعقد الأزمات فى سوق الشحن العالمى وزياده اسعار التوريدات و دربكه فى سلاسل الإمداد 
الخبراء بيقولوا أنه المشكله لو بأن ليها انفراجه يبقى هتظهر من نص ٢٠٢٢ او على بدايه ٢٠٢٣ .


تعليقات

إرسال تعليق