الأسود .. الآن نعرفهم

مع كل حكاية غريبة هنلاقي إنه معرفتنا محدودة جداً ، قصة عن تحالف من الأسود غيرت نظرتنا النمطية عنهم للأبد ، تحالف مابوجو ، بس قبل ما نخش في التفاصيل لازم تعرف الفرق معايا بين كلمتين هيساعدونا نفهم المقال .

لا تنسى الإشتراك فى ميون تون : قناة يوتيوب معلومات شيقة فيديوهات قصيرة

1 - يعنى ايه زمرة ؟ الزمرة هي مجموعة من اللبؤات إستوطنت منطقة من يوم ميلادها حتى وفاتها و يتوالى على حكمهم أسود ذكور مهيمنة مثل زمرة Sparta pride و Ottawa و Tslala و Castleton و Ximuvayane

زمرة تتكون من لبؤات

2 - التحالف هو مجموعه من الأسود الذكور المهيمنة تعمل و تصطاد معاً وتفرض سيطرتها على منطقة فترة من الزمن وتخضعها لحكمها ، من الممكن أن تحتوى منطقتهم على واحدة او أكثر من مناطق الزمر مثل تحالف Mapogo و west street و Majingilanes .

تحالف مكون من أسد

إقرأ أيضاً : جريمة قتل .. نهاية الفراعنة

ومن هنا نقدر نبدأ الحكاية .. كان يا مكان في 2002 زمرة ملكية معروفة بإسم Sparta pride ( إسبارطة ) ، يحكمها تحالف مكون من أسدين مهيمنين معروفين باسم west street ، عندها من الأشبال عشرة ، خمسة منهم ذكور ، الأشبال دى هما أصحاب حكايتنا النهاردة ، الأشبال اللى هيعملوا تحالف مابوجو ، التحالف اللى هيغير مفاهيم كتيرة عن حياة الأسود و يعيد صياغتها بمفهوم أكثر واقعية و رعباً ، الحكاية دى فيها العجب ، حاجات كتير مش طبيعية هتحصل فى حياة التحالف ده وتعالى نتكلم عن أول عجيبة فيهم ، فى الأول كده لازم تبقى عارف أنه مجتمع الأسود مجتمع محافظ جداً و لا يتهاون أبداً مع الأسود الرحالة الغريبة ، بس الغريب إنه فى 2002 إستقبلت زمرة إسبارطة أسد ذكر يافع رحال من خارج زمرتهم عنده 4 سنين ، الأسد MAKULU ( ماكولو ) ، فى واحدة من الحاجات اللى أدهشت مراقبين الأسود واللى أكدوا أنه الواقعة دى تكاد تكون نادرة الحدوث دا إذا مكنتش مستحيلة ، و رغم وجود أشبال داخل الزمرة إلا أن لبؤات سبارطة قبلت إنضمامه للزمرة بدون خوف منه ، الأغرب بقى أنه كمان التحالف الحاكم وقتها west street ( الأباء ) قبلوه كفرد من العائلة ، و بكدة تتشكل عناصر القصة ، 5 أشبال أخوات و ماكولو عشان تحالف مابوجو يتولد من اللحظة دى ، تعالى بقى نتعرف على أعضاء التحالف ده .

لبؤة ترعى أشبالها

إقرأ أيضاً : علماء عرب .. غيروا مجرى التاريخ

1- ماكولو Makulu أو الأسد الكبير أو الضخم واللى إتولد سنة 1998 ، و هو الوحيد من خارج العائلة ، لُبدته ضخمة داكنة أنيقة ، هو الأسد الأكثر قيمة في إصطياد الفرائس من حيث المهارة والقيادة وده اللى تقدر تقول عليه قائد التحالف .

2 - الولد الوسيم pretty boy كان يتمتع بذكاء إستراتيجي جّنبه الكثير من المعارك المباشرة و بكده إمتلك عدد أقل من الندبات مقازنة بأسود التحالف .

3 - مستر تي Mr T أو الشيطان هو الأعنف بينهم وله لُبدة شعرها مثل عرف الديك و تمت تسميته بالشيطان بعد قتله لأشبال إخواته من التحالف .

4 - صاحب الندبة scar و أخد الاسم ده نتيجة لوجود ندبة كبير على ظهره إمتدت حتى وركة الأيسر .

5- صاحب الضفائر Rasta dreadlocks وأخد الاسم ده عشان شعر لبدته كان زى الضفائر .

6- صاحب الذيل الغريب kinky tail أخد الاسم ده لإعوجاج فى ذيله .

ده يأخذنا لحاجه أغرب كمان ، في المنطقه اللي إتولدوا فيها و بسبب وجود فرائس كتير من كل شكل و لون فكان عادي وجود تحالفات من أسدين أو ثلاثة أو أربعة أو حتى خمس أسود بس ستة أسود ده نادر جداً و لم يتم رصده أو تسجيله قبل كده ، مش قلت لك الحكاية دي فيها العجب .

تعال بقى نعرف بداية التحالف سنة 2004 تحالف west street طردوا الأسود الستة اليافعة خارج الزمرة و من هنا بدأت حياه الترحال اللى هتاخدهم لمنطقه sabi sand ( سابى ساند ) في منتزة Kruger ( كروجر ) الوطنى في جنوب أفريقيا ، التحالف اللي هيتسمى على إسم شركة أمنية مشهورة فى جنوب أفريقيا وقتها والمعروفة بمابوجو .

عائلة ملكية أسد و لبؤة و صغيرهم

إقرأ أيضاً : أوكرانيا ... ساحة حرب روسية امريكية

على فكرة الترحال ده مش حاجه وحشة خالص أبدا ، ده حاجة عظمة جدا ومهمة فى حياة كل أسد ذكر ، لأنه فى الفترة دى بيعرف نفسه أكثر و يكتسب ثقة كبيرة ويكتشف مهاراته اللى هتخليه أسد مهيمن فى المستقبل ، و كل ما كان الأسد فى تحالف قوى ، زادت فرصته فى إنتزاع مملكته ، عشان كده تحالف مابوجو بأعضائه الستة كان حاجة مرعبة بجد ، قوة مابوجو ظهرت فى إختيارهم لفرائسهم واللى كانت تعتبر مجازفة كبيرة لأسود ثانية ، عشان كده مابوجو تخصصوا فى اصطياد أكثر الحيوانات العاشبة خطورة فى أفريقيا كلها وهى الجاموس الأفريقى ، وطبعاً ده زود ثقتهم بنفسهم وكمان خلاهم ميعرفوش الرحمة ، كل ده يوضحلك قوة مابوجو .

الجاموس الأفريقى حيوان خطير

إقرأ أيضاً : كرة القدم و العلم

بعدها بسنتين وبعد ما خبرتهم وثقتهم بنفسهم بقت فى العلالى جه الوقت عشان يتحولوا من أسود رحالة لأسود مهيمنة وبالفعل سنة 2006 دخلوا شمال سابى ساند و تحدوا التحالف المهيمن فيها المكون من أربع أسود ، وعلى غير عادة الأسود المتسللة الرحالة ، اللى بيعتمدوا طريقة التخفى والتسلل بهدوء ، فمابوجو اعتمدوا طريقة جديدة و هى الزئير العالى ، كأنهم بيقولوا للي مسمعش تعالى إسمع ، والطريقة دي هتكون بصمتهم الفريدة في دخول كل معاركهم لفرض سيطرتهم على مناطق جديدة وبعد قتلهم لأسد من الأربعة ، هرب الثلاثة الباقيين ، وبكده مابوجو بقى عندهم أرض ( مملكة ) يحكموها و لأول مرة .

في الوقت ده سابى ساند ضربتها واحدة من أكثر الموجات عنفاً فى تاريخها ، وده لأن مابوجو كان تحالف دموى بشكل أوڤر ، القتل غاية عندهم ، قتل الأشبال وكمان اللبؤات الخاضعين ليهم و أكلهم فى سلوك أول مرة يتم تسجيله ، و زود على كده سعيهم لقتل كل الأسود المهيمنة فى المنطقة حواليهم ، و عادةً كان أسلوب إقتحامهم مرعب بشكل يخلى الأسود المنافسة تهرب بمجرد ما تسمع زئيرهم أو حتى تواجههم ، ولكن في حاله القتال فمابوجو كانت تقتل بلا رحمة وتأكل الأسد المهزوم في تصرف هو الأغرب بين جماعات الأسود على الإطلاق .

الدراسات أكدت إنه مابوجو مسؤول عن قتل أكثر من 40 % من الأسود في سابى ساند و إنهم قتلوا على الأقل من 40 ل 50 أسد ذكر من تحالفات منافسة ، مساعد منتزة سابى ساند السابق Willem Botha قال إنه من أول يوم شاف فيه مابوجو و حتى مغادرته لمنصبه ، مابوجو قتلوا من 90 ل 110 أسد ، إضطر هو بنفسه إنهاء حياة 15 أسد منهم بعد تعرضهم لجروح خطيرة مؤلمة في محاولة لوضع حد لمأساتهم .

أسد يشارك غى نصب كمين لفريسة

إقرأ أيضاً : سلاح الصين المرعب

وفى خلال الأعوام الأربعة اللاحقة من 2006 ل 2010 نجح مابوجو فى زيادة منطقة نفوذهم فى سابى ساند عشان توصل لأكثر من 700 كم مربع ، تقريباً 7 أضعاف مساحة مانهاتن الأمريكية ، منطقة كبيرة لدرجة إنها كانت تحت حكم 8 تحالفات من الذكور قبلهم ، المناطق دى كانت فيها زمر ملكية زى Ottawa و Casleton و Tslala و Ximuvayane ، وده مره ثانية يخليك تشوف قد إية قوة مابوجو كانت غير عاديه بالمرة .

ولأن كل بداية و لها نهاية وكل قوى فيه اللى أقوى منه ، ففى يوم 8 يونيو 2010 حصلت المعركة اللى هتغير مجرى الأحداث بشكل دراماتيكي ، لما تحالف جديد مكون من خمس أسود يافعة دخلوا منطقة نفوذ مابوجو ، التحالف اللى هيتسمي Majingilanes ( ماچينجلانز ) بعد مقتل واحد منهم على يد مابوجو قدر يسترجع قوته و ينجح فى قتل واحد من مابوجو الأسد ( صاحب الذيل الغريب ) بعد معركة إستمرت لساعات تم كسر عموده الفقرى فيها ، بعدها هرب ( مستر تى ) و إنضم لمابوجو فى محاولة لإستعادة القوة من تانى ، بس مع كل يوم زادت فيه قوة ( ماچينجلانز ) ضعفت فيه قوة مابوجو ، ولأن المصائب لا تأتى فرادى ، ففى العامين التالين يعنى فى 2011 و 2012 فالأسدين ( صاحب الندبة وصاحب الضفائر ) إختفوا بشكل غامض بدون معرفة مصيرهم مع ترجيح فكرة إنه تم قتلهم على يد ( ماچينجلانز ) .

أسد بالغ

إقرأ أيضاً : هل تنجذب النساء للرجال ؟ لماذا ؟

ومع حلول 2012 ، ماكولو بقى عنده 14 سنة و الولد الوسيم بقى عنده 12 سنة و مستر تى بقى عنده 10 سنين ، و مع معرفتنا إن عمر الأسود لا يتجاوز 12 سنه في البرية ، فبقى واضح إن أيام مابوجو أوشكت على الإنتهاء ، فى نفس السنة دخل تحالف جديد طسابى ساند من الجنوب إلى ما تبقى من مملكة مابوجو ( بعد ما تأكلت مملكتهم لصالح مملكة ماچينجلانز ) و ينجحوا فى عزل مستر تى عن مابوجو وقتله فى معركة وحشية إنكسر فيها عموده الفقرى وحوضه و مكنش قادر إنه يتحرك و فضل يحارب بالشكل ده لساعات ، عشان يهرب بعدها ماكولو والولد الوسيم ويختفوا هما كمان .

بس فى أكتوبر 2012 تم مشاهدتم مرة تانية والمرة دى فى منتزة كروجر وكانوا بيقتلوا وقتها جاموس أفريقى من بتاع التخصص .

وفى 2013 تم مشاهدة ماكولو وحيداً ولآخر مرة على الطرق السريع المؤدى لمنتزة مالا مالا ( mala mala ) البعيد جداً عن أرضه اللى حكمها لمدة 6 سنين كاملة ، كان هو وقتها ملكها المتوج .

إقرأ أيضاً : تفكك أوروبا ... بداية النهاية

وبكده تنتهى واحدة من أعنف فترات حكم سابى ساند و أكثرها دموية ، وعلى الرغم من إنتهاء عهد مابوجو ، إلا إن تأثيرهم واضح جداً لحد النهاردة ، التأثير السلبى نتيجة النقص الحاد فى أعداد الأسود بيقابله وفرة فى أعداد الكلاب البرية ، التأثير اللى إمتد عشان يشكل بيئة سابى ساند و يأثر فى الزمر الملكية هى كمان ، فزمرة Castleton إنخفض أعداد أفرادها من 22 إلى 6 فقط ، و زمرة Tslala إنخفض أعداد أفرادها من 10 إلى 5 فقط ، فى حين إن زمرة Ximuvayane إختفت للأبد ، ولحد النهاردة لسة لمابوجو أبناء وأحفاد فى زمرة Ottawa .

ياريت تشاركنا رأيك فى التعليقات

الكاتب م . محمد توفيق

إقرأ أيضاً :

المصادر :

بحث فى المدونة

الأسود .. الآن نعرفهم

الأسود .. الآن نعرفهم

تعليقات

إرسال تعليق